ఏ సినిమా ముగింపు మిమ్మల్ని బాధ పెట్టింది ? సుఖాంతం చేయొచ్చు కదా అని దర్శకుడ్ని తిట్టుకున్న సందర్భాలున్నాయా ?
కొన్నేళ్ల క్రితం యూట్యూబ్ లో గల్ఫ్ అనే తెలుగు సినిమా చూసాను. మొత్తమందరూ కొత్త మొహాలే. దానికి తోడు ఆ దర్శకుడు ఏయే సినిమాలు తీసాడో కూడా తెలియదు. కేవలం "గల్ఫ్" అనే పేరున్నందుకు మాత్రమే సినిమా చూడాలనిపించింది.
మనదేశంలో ఉపాధి దొరక్క, అరచేతిలో స్వర్గం చూపించే గుంటనక్కల్లాంటి ఏజెంట్ల మాటలు నమ్మి ఎండమావులవంటి గల్ఫ్ దేశానికి వెళ్లిన కొంతమంది యువతీయువకుల కధే ఈ సినిమా. నిర్మాణ పరంగా లోపాలు కనిపిస్తున్నా, అప్పుడప్పుడూ కంటిన్యూటీ లేకపోయినా, కొన్ని సందర్భాల్లో కళాత్మక స్వేచ్ఛ తీసుకున్నాడని తెలుస్తున్నా కేవలం సినిమాలో చూపించిన అంశం నచ్చడం వల్ల సినిమా పూర్తిగా చూడాలని నిర్ణయించుకున్నాను.
దర్శకుడు సినిమాను విషాదాంతంగానే తెరకెక్కించాడు. ఈ సినిమాను ఎక్కువమంది చూసుండకపోవచ్చు కాబట్టి ఎక్కువ వివరాలు చెప్పలేను. ముగింపు చూసిన తర్వాత ఒక పదినిమిషాలు తిట్టుకున్నాను, ఇలా ఎందుకు చేసాడనుకుంటూ. కానీ సినిమాని సుఖాంతం చేసినట్లయితే ఆ సినిమాని నేనెప్పుడో మర్చిపోయేవాడిని. బహుశా దర్శకుడి ఉద్దేశ్యం కూడా అదేనేమోనని సరిపెట్టుకున్నాను.
Comments
Post a Comment